AXUT!
Antzerkia
Axut! euskarazko antzerkia garatzeko xedearekin sortu dugun kolektiboa da.
25 urtez eman dugu antzerkia euskaraz eta frantsesez, baina orain, euskara hutsean baino, euskara betean ekitea erabaki dugu. Ez garelako hutsetik mintzo, betetik baino.
Euskal antzerki garaikidea eta herrikoia dugu helburu.
Ibilbide berriaren erronkari bi galderekin heldu diogu:
Nori mintzatzen gatzaizkio?
Nori eskaintzen diogu gure ondasun guztia?
Antzerkia herri baten isla bada, garai jakin batean, orduan eskema propioak sortzeko beharra dugu: eskema ekonomikoak eta artistikoak, bitartekaritza eta heziketakoak, komunikazio eta ekoizpenekoak, teknikoak, saretze eta harrerei lotutakoak...
Nola egingo dugu kexatzeko, maitatzeko, haserretzeko, oihukatzeko, iraintzeko eredurik ez badugu?
Zerk sortuko ditu ereduak arteak ez bada?
Gure arteak egiten gaitu euskaldun, euskaraz sortu eta pentsatutako arteak.
Etxekoak gara, etxekoei mintzo, eta horrek munduko egiten gaitu.
Kideak:
- Manex Fuchs
- Ximun Fuchs
- Arantxa Hirigoyen
- Argi Perurena